இரு - வினைச்சொல்
Word forms: இருக்க, இருந்து
1.(நிலைமையைக் குறித்தல் தொடர்பான வழக்கு)
a.(ஒருவர் அல்லது ஒரு பொருள், ஓர் இடம், பரப்பு, சூழல் போன்றவற்றில் குறிப்பிட்ட நிலையில்) காணப்படுதல்; அமைதல்
- உன் அப்பா வீட்டில் இருக்கிறாரா?
- நீ தாத்தாவோடு இருந்தது தெரியாமல் தேடிக்கொண்டிருந்தோம்.
- பிற கிரகங்களில் உயிர் இருக்கிறதா என்று ஆராய்ச்சிகள் நடந்துகொண்டிருக்கின்றன.
- தமிழில் சிறந்த சிறுகதை ஆசிரியர்கள் பலர் இருக்கிறார்கள்.
- கோவிலுக்கு எதிரில் நிறையப் பூக் கடைகள் இருக்கின்றன.
- ரசத்தில் உப்பு இருக்கிறதா என்று பார்த்துச் சொல்.
- புகைப்படத்தில் இருக்கும் பெண் யார்?
- அவனுடைய கன்னத்தில் நிறைய தழும்புகள் இருந்தன.
- அவருடைய நகைச்சுவைகளில் துளிகூட ஆபாசம் இருக்காது.
- இமயமலை இந்தியாவில் இருக்கிறது.
- வானில் நிலவு இருக்கிறது.
- என் நிலையில் நீ இருந்தால் என்ன செய்வாய்?
- நீர் கலங்கலாக இருந்தது.
- வீட்டில் ஜாக்கிரதையாய் இரு!
- நாம் ஆரோக்கியமாக இருக்க உடற்பயிற்சி அவசியம்.
- இந்தச் சேலை புதிதாக இருக்கிறதே!
- அந்த மூட்டை கனமாக இருந்ததால் என்னால் தூக்க முடியவில்லை.
- குழந்தை அதன் அம்மாவின் சாயலில் இருந்தது
2.(நிலைத்தலைக் குறித்தல் தொடர்பான வழக்கு)
a.(குறிப்பிடப்படும் இடத்தில் ஒருவர்) தங்குதல்; வசித்தல்
- அவர் பத்து வருடங்களாக மயிலாப்பூரில் இருக்கிறார்.
- நீ கிராமத்துக்குப் போய் ஒரு வாரம் இருந்துவிட்டு வா.
- நாட்டின் மக்கள்தொகையில் 70 சதவீதம் பேர் கிராமத்தில் இருக்கிறார்கள்.
b.(ஓர் இருக்கையில், இடத்தில்) உட்கார்தல்
- அவர் நாற்காலியைக் காட்டி ‘இருங்கள்’ என்று சொன்னார்.
- அவர் ஊஞ்சலில் இருந்துகொண்டே பேசினார்.
- அவரை உள்ளே வந்து இருக்கச் சொல்
c.காத்திருத்தல்
- சற்று நேரம் இருந்து அவரைப் பார்த்துவிட்டு வா!
- கொஞ்சம் இருங்கள், நானும் வந்துவிடுகிறேன்
d.(நினைவில், கவனத்தில்) தங்குதல் அல்லது பதிதல்
- அவனை நான் முதலில் சந்தித்த அந்த நாள் நன்றாக நினைவில் இருக்கிறது.
- என்னை ஞாபகம் இருக்கிறதா?
- இந்த விஷயம் உங்கள் கவனத்தில் இருக்க வேண்டும்
3.(உடைமையைக் குறித்த வழக்கு)
a.(நான்காம் வேற்றுமை அல்லது ஏழாம் வேற்றுமை உருபு இணைந்த பெயர்ச்சொல்லுடன் வரும்போது) (ஒரு தன்மை, பொருள் போன்றவற்றை) உடையதாக அமைதல்; கொண்டிருத்தல்; வைத்திருத்தல்
- அவருக்கு ஒரு வீடு இருக்கிறது.
- குழந்தைக்கு இன்னும் காய்ச்சல் இருக்கிறது.
- எனக்குக் குடும்பம் இருக்கிறது; அதுதான் எனக்கு முக்கியம்.
- எனக்கு மக்கள் ஆதரவு இருப்பதால் நான்தான் நிச்சயம் வெற்றி பெறுவேன்.
- எனக்கு இரண்டு பையன்கள் இருக்கிறார்கள்.
- அவருக்கு வயது ஐம்பது இருக்கலாம்.
- அவளுக்கு நிறைய வேலைகள் இருந்ததால் அவனுடன் கடைக்கு வர முடியாது என்று கூறிவிட்டாள்.
- எனக்கு இருக்கும் ஒரே பிரச்சினை நேரத்தை எப்படிக் கழிப்பது என்பதுதான்.
- அவனுக்கு எவ்வளவு திமிர் இருந்தால் என்னையே எதிர்த்துப் பேசுவான்?
b.(ஒன்று நிகழ்வதற்கு) குறிப்பிட்ட அளவு நேரம் எஞ்சுதல்
- ரயில் கிளம்ப இன்னும் ஐந்து நிமிஷம் இருக்கிறது.
- அமாவாசைக்கு இன்னும் எத்தனை நாட்கள் இருக்கின்றன?
4.(பிற வழக்கு)
a.(குறிப்பிட்ட எண்ணம், உணர்ச்சி போன்றவை) ஏற்படுதல்; தோன்றுதல்
- அவருக்குப் பெண்டாட்டி பிள்ளைகளைப் பார்க்க வேண்டும் என்று இருக்காதா?
- தன்னுடைய கஷ்டத்தை நண்பர்கள் பகிர்ந்துகொள்ள மாட்டார்களா என்று அவளுக்கு இருந்தது.
- ஏன் இங்கு வந்தோம் என்று இருக்கிறது
b.(விரதம்) கடைப்பிடித்தல்; (பட்டினி) கிடத்தல்
- காவிரிப் பிரச்சினைக்கு நிரந்தரத் தீர்வை வலியுறுத்தி அவர் ஒரு நாள் உண்ணாவிரதம் இருந்தார்.
- என்னால் இருபத்துநாலு மணி நேரம் பட்டினி இருக்க முடியாது.
- வாரம் ஒரு நாள் மௌன விரதம் இருப்பது அவர் வழக்கம்
c.ஒன்று நிகழும் அல்லது ஒன்றைச் செய்யும் நிலையில் அமைதல்
- நாங்கள் சட்டங்களை மீறுவதாக இருக்கிறோம் என்றார் காந்திஜி.
- புது நாடகம் போடுவதாக இருந்தோம்.
- நாங்கள் இருவரும் அடுத்த ஆண்டு திருமணம் செய்துகொள்ளலாம் என்று இருக்கிறோம்.
கண்ணைக்கட்டுது
